Istória badak: Iha ai-katapa huun

Iha ai-katapa huun

Ajau ho ninian kolega nain tolu seluk, tuur hela iha kadeira husi roda kareta uzadu iha ai-katapa huun, besik tia Sika-nian kioske oin, iha oras lokraik ida. Mane foin-sa’e sira ne’e konta istória barullu los, dala ruma, tia Sika hasé sira ho dehan “hatun imi-nian radio aat ninian lian ituan”, maibe sira la-foti ba lia saida maka tia Sika dehan. Ho goza Ajau hatan “tia Sika, mai ho ami haree Tiktok husi agaja sira ne’e”, mane foin-sa’e sira ne’e hamnasa ho saida maka Ajau foin ko’alia ne’e, no sira-nian matan hateke los deit ba telefone ne’ebé Ajau kaer hela iha ninian liman. Kontinua hateke ba telefone ne’e, sira fó komentariu oioin, Agau dehan “aaiiihhh Tiktoker sira halo rai suar paahh”, hodi aumeta ba Agau-nian komentariu, Alitu hatan “antaun la-kleur tan sira halo ahi lakan sa’e ona”. Ameu, hamnasa deit ba ninian belun sira-nian komentariu. Rona nune’e, tia Sika sinti hirus ituan. Tanba nia sinti foin-sa’e sira nee soe tempu ho buat ne’ebé la-iha valór. Maibe, tia Sika laran diak tebes. Nia hanoin atu eduka foin-sa’e sira ne’e, ho nune’e nia ko’alia ba sira, dehan “rona lai..!”, foin-sa’e sira para ho komentariu sira ne’e no hateke fali  ba tia Sika. Tia Sika, kontinua ko’alia, “imi hatene ka lae saida maka Buenos Aires nee?”, foin-sa’e sira hatudu oin konfuzaun tebes, ho oin sei konfuzaun no lian la-fiar aan Alitu hatan “nee biskuit ida ninian naran, karik?”. Tia Sika hamnasa, depois nia hatan “auohh.. Tiktoker sira la-fó hatene ba imi ka? Katak Buenos Aires ne’e sidade kapitál husi nasaun Arjentina. Aiihh..hein lai, keta halo, imi la-hatene saida maka Arjentina?”. Ajau, hamriik husi ninian tuur no ko’alia ba ninian belun sira, “ha’u moe tiaona, fila lai ba uma, atu estuda lai. Lao ona, ita ba estuda. Sei lae, orsida Munisipiu sira iha Timor ninian naran mos ita la-hatene ona”. Ajau-nian belun sira mos hamriik no hatete adeus ba tia Sika no hakat ba sira-nian uma, molok fila Ameu nafatin fó ninian hamnasa maibe hamnasa urgullu ninian ba tia Sika. Nakaras, mai dadaun ona hodi hafalun ai-katapa huun nee, ai-katapa huun ho kadeira husi roda kareta uzadu ne’e mamuk to’o kalan.

Hakerek nain:

Mariani VK.