Istória badak: Tauk ba Dili

Dadeer to’o kalan, Anita sei tuur honoin murón. Nia, iha hanoin barak tebes. Kona-ba saida maka nia atu halo bainhira nia to’o iha  sidade boot, Dili. Anita, remata ona ninian eskola sekundária iha Maliana. Maibe nia mai husi suku Tapo. No Anita remata ninian eskola primária iha Tapo no Pre-sekundária iha Bobonaro vila. Nia moris tomak seidauk husik Munisipiu Bobonaro.

Munisipiu Bobonaro sai hanesan àrea Timor-Leste nian ne’ebé fronteira ho àrea Indonezia. Ema iha Munisipiu Bobonaro bolu ema sira iha parte Indonezia ho “ema mota sorin” ou “sira mota sorin”.

Han kalan tau ona iha meza, maibe Anita sei tuur murón. Haree ida ne’e, Anita-nia avó-feto dehan “bei-oan, mai ita han ona. Sei lae Tapo-nian anin malirin, hamalirin ona hahán sira ne’e”. Anita hatan nia avó ho diak no lao ba tuur iha meza ho ninian avó hodi han. Bainhira, Anita atu aruma bikan mamuk sira ne’e, nia avó komesa ko’alia “nusa maka loron tomak ne’e bei-oan tuur hodi hanoin barak los ne’e?”, ho kuidadu Anita hatan, “ha’u hanoin oinsa maka ha’u bele hela iha Dili. Sidade ne’e bo’ot no ema barak, ha’u-nian tetun sei logat tan bunak ninian. Ha’u ema foho-oan, ha’u la-iha kolega, ha’u la-hatene dalan. Ha’u tauk avó, depois ha’u ba Dili agora, antaun avó sei mesak oan ona” ko’alia nune’e Anita-nian matan been mos monu. Avó-feto ne’e nonok kleur hodi hateke ho laran susar ba ninian bei-oan. Ikus mai avó ne’e fó lia-menon, “mane ida husi mota sorin dehan sai fraze furak husi livru ida ne’ebé Pramoedya Ananta Toer maka hakerek, katak berani atu halo saida? Berani ba negativu husi hahalok ida kria atu hamonu deit” (..”keberanian untuk apa? Berani untuk berani sama negatifnya dengan sewenang-wenang untuk wenang-wenang. Semuanya kemewahan belaka”). Avó ne’e kontinua “bei-oan-nian an la-sala, ba eskola didiak no hatete ba ema sira iha Dili katak, ha’u maka ne’e. Kalan ona, ba toba ona ba. Para aban sa’e Angguna la-bele muta”. Anita haksolok tebes ho liafuan osan-mean husi ninian avó. Antes ba toba nia hakuak metin los nia avó

Anita-nian avó naran Maria. Avó Maria iha tempu Portugues Timor remata eskola boot iha Dili, no foin maka sai professora fulan hat deit iha eskola primária ida iha Dili, depois militár Indonezia halo invazaun. Tanba familia tomak husi avó Maria mate iha invazaun laran antaun avó Maria tenki fila ba ninian knua, Tapo. Hodi hein sira nian uma-lulik. Depois, Avó Maria kaben ho mane Tapo oan ida no iha oan feto ida, ne’e maka Anita-nian inan. Maibe avó Maria-nian oan feto & nian la’en mate iha dezastre bis husi Maliana ba Dili no husik hela bebé Anita ho avó nain rua no ikus mai avo Maria-nian kaben mos mate tanba moras malaria. To’o agora Anita ho avó Maria maka luta ba mehi sira ne’ebé sira iha.

Mariani VK.