Istória badak: Hili

Dadeer ne’e iha to’os uma-ninin, avó-mane, Atoi ho ninian bei-oan Nene rega hela ai-horis ne’ebé moris buras tebes. Iha to’os ne’e iha ai-dila, hudi, samarle, fehuk, tomate, ai-manas, belimbi no ai-horis seluk tan. Depois rega, avó Atoi, taa hudi-tambaga no ku’u ai-dila rua. Tanba hudi-tambaga no ai-dila ne’e tasak ona. Avó Atoi haksolok tebes haree ninian liman fatin fó rezultadu ne’ebé di’ak tebes. Iha tempu hanesan husi ko’alia ho ninian bei-oan, avó Atoi hatene buat foun ida, nune’e:

Avó Atoi: bei-oan mai ita-rua diskansa lai. Ita-rua halo servisu lubuk ona iha dadeer ne’e. Ajuda avó lori ai-dila rua ne’e no lao, ita ba tuur iha varanda oin.

Nene: di’ak, avó.

Avó Atoi: ita-rua han lai ai-fuan rua ne’e. Bei-oan, hakarak hili hudi-tambaga ka hudi?

Nene: lakohi, ha’u hakarak hili maka oinsa kuda no kuida ai-fuan sira ne’e to’o fó fuan mai ha’u.

Avó Atoi: ha’u husu bei-oan atu han ka lae?

Nene: ha’u-nian kabun hamlaha, han hudi-tambaga ida no ai-dila sorin sei halo ha’u bosu. Maibe, ha’u seidauk hatene oinsa maka bele kuda no kuida ai-fuan sira ne’e ho di’ak. Avó, bele hanorin ha’u ka? 

Avó Atoi: ne’e fasil, ha’u bele hanorin maibe nusa bei-oan la-ba aprende maka halo kareta, aviaun ka komputador sira ne’e. Ne’e sei fó osan barak ba bei-oan.

Nene: ha’u lakohi. Ha’u hakarak hili maka kuda no kuida ai-fuan & ai-horis sira deit.

Avó Atoi hatene ona katak, loos maka fó oportunidade ba bei-oan hodi habelar ninian forsa hodi kria. Kria saida maka nia mehi no saida maka di’ak ba nia, no di’ak ne’e hatutan ba ema seluk mós.

Dili, 30 Maiu 2021.

Hakerek nain:

Mariani VK.